مختارات - أحمد فؤاد نجم - البتاع
 

البتاع





ياللي فتحت البتاع
فتحت على مقفول
لأن أصل البتاع
واصل على موصول
فأى شيء في البتاع
الناس تشوف على طول
و الناس تموت فى البتاع
فيبقى مين مسؤول

**

و إزاى حتفتح بتاع
في وسط ناس بتقول
بأن هذا البتاع
جاب الخراب بالطول
لأن حتة بتاع
جاهل غبي مخبول
أمر بفتح البتاع
لإنه كان مسطول

**

و بعد فتح البتاع
جابوا الهوا المنقول
نكش عشوش البتاع
و هد كل أصول
و فات في غيط البتاع
قام سمم المحصول
و خلا لون البتاع
أصفر حزين مهزول

**

و ساد قانون البتاع
و لا علة و لا معلول
فالقاضي تبع البتاع
فالحق ع المقتول
و الجهل ساد في البتاع
و لا مقري
و لا منقول
و الخوف سرح في البتاع
خلا الديابة تصول

**

يبقى البتاع في البتاع
و الناس صايبها ذهول
و إن حد قال د البتاع
يقولوله مش معقول
و ناس تنام ع البتاع
و ناس تنام كشكول
وناس تعيش بالبتاع
و ناس تموت بالفول

**

آدي اللي جابه البتاع
جاب الخراب مشمول
لأن حتة بتاع
مخلب لراس الغول
باع البتاع بالبتاع
و عشان يعيش على طول
عين حرس بالبتاع
و برضه مات مقتول .





المصدر : جريدة الأهالي المصرية - الأربعاء - 25 / 04 / 1984

مشاركة: مختارات - أحمد فؤاد نجم - البتاع
 

شكرا للأخ إدوارد على هذه القصيدة الجميلة لشاعر فذ من شعراء العامية المصرية ..نتمنى على أخي إدوارد أن يتحفنا ايضا بشيء من شعره ...وأن لا ينقطع عن إمدادنا بهذه النفائس للشعراء الكبار ...تحيتي لك وأهلا وسهلا

مشاركة: مختارات - أحمد فؤاد نجم - البتاع
 

لا أنسى يوم حضرت أمسية شعرية لنجم في دمشق عام 85
كان الحضور بالآلاف وأبدع الشاعر يومها في أسر قلوب وعقول سامعيه بشعره المقاوم

شكرا على النقل أخي إدوار

رد: مختارات - أحمد فؤاد نجم - البتاع
 

كم أنا معجب بقصيدة الشاعر الكبير أحمد فؤاد نجم... عندما قرأتها لأول مرة منذ عدة سنوات كتبت الرد عليها واحتفظت به ضمن قصائدى المتواضعة غير المنشورة.... واليوم أرجو أن يتقبلها من قارئ مجلة أقلام الثقافية.

د. أنور سيالة


الرد على أحمد فؤاد حسن في قصيدته " البتاع"


يا نجْم انـْـسَى البـتاع ... خَلـِّـي الدِّيابَه تـْصُول
مالـَـكْ ومَالْ البتاع ... مَفـْتـُوحْ وَلا مَقـْـفــول
إنْ كانْ كـَـبْش البتاع ... جاهل غبي مخبول
بـِـيـِـشِــم ريحْةِ البتاع ... يصْحَى وينام مَسْـطول
شـَـمَّـمْـلـُهْ حِـتــَّـة ْ بتاع ... خـَـلـِّـيهْ يجول ويشول(1)
وارميلـُهْ حِـتــَّة ْ بتاع ... يصْبَحْ بها مشغول
وانـْـسَى انفتاح البتاع ... وحالةِ المحصول
وسِـيبْ قانون البتاع ... وقولْ كلامْ معقول
%%%%%
يا نجْم انسَى البتاع... دا الكل فينا شـْكـُـول(2)
الغـَمْ فِي أصْل البتاع ... خَـلـَّـى القـَوِي معلول
وانْ كان كابوس البتاع ... خَلـَّـى الشعوب تقول:
" يا رب شيل البتاع ... وعَمَــلـُهْ والمعمول "
ورغم أنّ البتاع ... سِجـِـنْ وكُـشـَـري وفول
كابوس وغـَمّ البتاع ... لازم في يوم بيزول
%%%%%
أهُو انتَ شُفـْــت البتاع ... واقِفْ يجول ويصول
لما انفتحلهْ البتاع ... وجالـُـهْ عرض وطول
مَشـَـافـْش راسْ البتاع .... وراح نايم مقتول
%%%%%

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــ
(1) يشول = يرتفع
(2) شكول = مشابه


د. أنور سيالة
لم أذكر الإسم

رد: مختارات - أحمد فؤاد نجم - البتاع
 

المعنى الصحيح رأى الشخصى(حمدى بيومى)
يا للي فتحت البتاع (الاقتصاد )
فتحك على مقفول
لأن أصل البتاع (الانفتاح)
واصل على موصول (تصدير واستيراد)
فأى شئ في البتاع (الرياسة)
الناس تشوف على طول
والناس تموت في البتاع (المريسة)
فيبقي مين مسؤول ؟
وإزاي حتفتح بتاع (الاقتصاد(
في وسط ناس بتقول
بأن هذا البتاع (الانفتاح الاقتصادى )
جاب الخراب مشمول
لأنه حتة بتاع )رئيس)
جاهل غبي مخبول
أمر بفتح البتاع (الاقتصاد)
لأنه كان مسطول !
وبعد فتح البتاع (الاقتصاد)
جابوا الهواالمنقول (استوردنا حتى الفول)
نكس عشوش البتاع (خرب الصناعة المصرية)
وهد كل أصول
وفات في غيط البتاع ( الفلاحين)
قام سمم المحصول
وخلا لون البتاع ( الزروع (
أصفرحزين مهزول
وساد قانون البتاع (الغابة)
ولا عله ولا معلول
فالقاضي بتع البتاع (المرتشى)
فالحق على المقتول
والجهل زاد في البتاع( البلد)
ولا مقري ولا منقول
والخوف سرح في البتاع (الناس)
خلا الديابه تصول ( الشرطة وأمن الدولة )
يبقي البتاع في البتاع ( الخيبة في الرئيس)
والناس صايبها ذهول
وأن حد قال دا البتاع (الرئيس اى كلام عميل مثلا)
يقولوا له مش معقول
وناس تعيش بالبتاع (بالرفاهية)
وناس تموت بالفول
وناس تنام على البتاع (الحرير)
وناس تنام كشكول (كشت من الجوع)
آدي اللي جابه البتاع (الانفتاح)
جاب الخراب بالطول
لأنه حتة بتاع (رئيس)
مخلب لراس الغول (أمريكا)
باع البتاع بالمتاع (البلد)
وعشان يعيش على طول
عين حرس بالبتاع (بالسلاح)
وبرضه مات مقتول (السادات)