منتديات مجلة أقلام - مجنون / د. إياد قحوش

منتديات مجلة أقلام (http://montada.aklaam.net/index.php)

- منتــدى الزجل والشــعر العــامي والنبـطي (http://montada.aklaam.net/forumdisplay.php?f=7)

- - مجنون / د. إياد قحوش (http://montada.aklaam.net/showthread.php?t=1962)

إبراهيم محمد شلبي

15-01-2006 03:53 PM

مجنون / د. إياد قحوش

وبتزنّ عالدفتر..
ريشة غناني البرد
من حلمها المبلول
وبتصير تتذكّر
وتنتّف بهالورد
فوق السطر وتقول
بيحبّني .. معقول?

وبيغصّ حرف النّون بالنقطه
معقول مابيحبني ?
وبينام حرف الياء عالشّحطه
وفوق الورد بتصير لمّا الورد منتوف
تمشي وتتمختر
بتصفُن بحرف النّون..
شو بيعجبا..أشقر
وبتخطّ خمس حروف
مجنون ..?
اي مجنون ..مجنون ومكتّر

لاتسألي عنّو
سافر عَ جنح الرّيح
موّال ليلة تلجْ
وتارك عَ دربو زيح
للي قربو منّو
شافو دموع ونار ..دخانها تلميح
ودارووا مع البيكار
صار الهوا مراجيح ..
المابيعرفوا إنّو
شهر البكي كانون
وقفوا عَ بابو نهار
ويجربوا مفاتيح
وكتبوا ع باب الدّار
مجنون ..
إي مجنون ..مجنون ومكتّر

وهالناطرين الصوت
يروح مايرجع ..
قعدوا ع نهر الموت
شافوا الصدى جايي
وبيهز عالميلين ..
حصان وشحط مدفع
وبالخرج في حكايه
عن شاعر النهرين
السافر ع تكايه
بالحلم ..طول الليل
ولما فتح العيون
اتطلع بالمرايه
اتطلع ..قشع مجنون ..
مجنون..اي مجنون ..
مجنون ومكتر ....

---------------
د. اياد قحوش

د . حقي إسماعيل

15-01-2006 06:42 PM

قلت الورد موجود

بس غابوا اللي يردوه

ما بين ورد وورد

حاولوا يقتلوه

زمان كان البعد يقتل

اليوم البعد ينسوه

عيني ع الدرب يا خي

والروح كلها ولوه

مناطر حبيب القلب

يجي يداوي المشدوه

الساعة الآن 01:10 AM.