رحتي و جيتي
...... (بالحلم)



رحتي بالحلم
من قبل وجّ الضوّ
لا لحّقت ودّعك
ولا قول الله معك

و جيتي بالحلم
بس كان مافي جوّ
لا قدرت قلّك فلّي
ولا كان فيكي تضلّي

رحتي...
متل ما بيرجعو ولاد الرياف
من شغل لمديني

وجيتي...
ع غفلة
الزرع منّك خاف..
والساقي الحزيني
قالو...
أرضنا عرض
بس هنّي باعو الأرض




رحتي...
نهار وصار ميةّ نهار
شوفي الأمل شو ملّ

وجيتي...
حكاي مزيّني بأسرار
ومحّد عرف شو الحل

طلعتي من البرواز
والما بجزلك... جاز




رحتي...
متل مابينقطف هالورد
اللي كان فوق سياج

وجيتي ...
أميرة وخايفة من البرد
وفجأة...انسرق هالتاج

استنيتك من العصر
ونسيتي درب القصر




رحتي..
كأنك خمس ست مجاد
من هالزمن لبعيد

وجيتي...
متل مابيفرحو لولاد
والدنيي وقفة عيد

عم يضحكو للجاي
وتيابن مخبّاي




رحتي...
متل غيمات عم يبكو شتي
والزرع مو عطشان

وجيتي...
متل موسم عزى أو بكي
ومافي حدا زعلان

خلّيتي أملي يطول
و...تخرّب المحصول




رحتي...
كأنك مرّة الفلاّح
على كروم التين

وجيتي...
بساتين وحقل تفّاح
وصابو الحقل بالعين

لا أكل منّو وشبع
ولا كان يلاقي النبع



رحتي...
متل شي كرم قرّب ينقطف
شو نطرت السلّي

وجيتي...
أميرة
وفارس
وعم تنخطف
قصّة لتتسلّي

يافارس بلا خيل
لسّا الطريق طويل



رحتي...
متل ما كان هاللماضي وكنت
جهلان ع جهلى

وجيتي...
متل شي شب عم يخطب بنت
وما وافقو أهلا

غلّو عليه المهر
تا طقّ من القهر



رحتي...
متل المعلّقات العشر
بحيطان هالكعبي

وجيتي...
قصيدة
وخايفة من النشر...
وياطاسة الرعبي

عزّاني فيكي الهنا
والبيت... وبنتي... وانا



رحتي ...
بالبحر لا بوصلة ولا شراع
ولا خايفة من الغرق

وجيتي ...
متل بحّار عمرو ضاع
والبحر منّوا نسرق

عافتو لمديني
وغرقت ها لسفيني





رحتي...
متل جمّال فوق الرمل
وجمالو عطشاني

وجيتي...
بوقت اللي انقطع هالأمل
والبعد نسّاني

يا رمال ما بتنعدّ
وأحلام ...مش ولا بد




رحتي
متل كلمات كتبتها لوراق
زعلت من ال... يمكن

وجيتي
متل موّال من حزن وفراق
والعاشق مسلطن

غنّالك بها الليل
وفجأة إنطفى القنديل




رحتي
وراح الفرح من يوم ما رحتي
وما وعيت من همّي

وجيتي
بمنامي... وشو عشقت تختي
ويا مسبحة التمّي

ربيتو شبر بندر
شو ندمت لمّا كبر




رحتي
متل شي طير مكسور الجناح
راجع على الغربي

وجيتي
بعد ما الحبّ كلّو راح
وضلّ الهوى الغربي


ع غفلة هبّ الهوى
فرّق الكانو سوى



رحتي...
كأن الليل
والبعد
وأنا
من ساعت اللي رحت
طلعو يلاقو
للسعد
والهنا
وضلّيت وحدي تحت

ماطلعت صوب الفرج
وأنتو اصحاب الدرج


ل
خالد الكنج