 |
منتديات مجلة أقلام
(http://montada.aklaam.net/index.php)
- منتــدى الزجل والشــعر العــامي والنبـطي
(http://montada.aklaam.net/forumdisplay.php?f=7)
- - شاعر أراري
(http://montada.aklaam.net/showthread.php?t=5921)
شاعر أراري
شاعر أرارى شاعر أرارى قرارى من راسى وراسى ع اللى بيجرى ف البلد مال تعب جوايا بتغنيه عنيها - ف كل صرخة – وهى بالسوط اللى بات مفتول بحبل سكوت ولادها بتتجلد شاعر أرارى باحبها لكنّها .. لسّاها زىّ كتير قوى مش عارفة مين بيحبها فرسة بتِحرِن .. كل ما المس خدها .. ترفس بأقوى عزمها وان حط إيده السايس المحظوظ عليها تنخ يركب ضهرها وتطير كما الرهوان بساط الريح يدوب مسمار ف حافر رجلها تاخده لمكان .. يُؤمر يُطاع شبيك وميت لبيك يا مالك أمرها يا .. مُرّها !! وألِفْ أدور حوالين جدار الاصطبل ألحس صبرها !! شاعر أرارى بيحبها لكنْ ما حدش يعرفه مجهول قوى من كُتر حبه بيتشوى لكنّها .. ضاربة الطناش وكأن سايس ضهرها لسّه شبيهه يا ناس ما جاش ! الله يسامح والدى علمنى الأدب !! لوكنت أفهم ف السياسة كنت أسوس نفسى وابوس نعل اللى عنده فلوس يريّل فوق ورقها المُحْمُحى أجعصها سايس ف البلد لكنْ مع كل الأسف معرفش غير فى الطب حبة وحبتين شعر وأدب أما السياسة شرطها إنّك تكون لا شعر يا ابنى ولا أدب !! قسمة ونصيب سهمك يطيش .. سهمه يصيب تصبح مفيش .. يصبح أديب !! حتى ف مماته يا طبيب تلقى .. الإذاعة عالمية والجنازة عسكرية موتة يا ابنى ميّة ميّة حاجة تفتح نفسه إن البيه يموت ! أما مماتك .. زى عيشتك .. صرختين ما لهمش صوت وعشان تفوت " صهين " وإحساسك ونارك سكتة فى وسط السكوت اخفى الحقيقة عن عيون قلبك ودارى ف ساعتها تصدق لو تقول : شاعر أرارى !!! |
تِعْرَف عيوبنا - ياللي شِعْرَكْ بُنْدُقي - الإنعزال أنا شايله زادي وزُوَّادتي وباابحَث كل يوم عن كلمه صادقه بين ضبابات الغيوم فيه زحام كتير زَي الرُكامْ وفيه كام قصيده ماشيه فوق فرسَه وفي إديها اللجامْ مش كل يوم في مَرْكَز الإبداع نلاقي ناس بِحَقْ كلمتها صِدْق بس النهاردَه فيه فرَسْ مَلجوم بشاعِرْ قلبُه زَيَّكْ / بُنْدُقي ماضي على خط الصراط المُستقيم لَمَّا بِيِحكي يقول لنا إزاي فتَحْ في الساتِرْ المَلْعون زمان بجنوده مَعْبَرْ أو ممر حَطَّمْ جدار الشر والشر من يومه ف بلادنا صهيوني أو لون مقارِب للصفار ملعون اليوم ح يحكي الشاعِرْ المِغوار في مركز الإبداع يفرِدْ لنا صفحات كتابُه " ناصِرْ الفُقرا " صابِحْ مُهَنْدِسْ وف مِساه شاعِرْ فارِس وقادِر ع البُنا عَمَّرْ صحاري قلبها المحزون فضحكت لُه قال : يابَهِيَّه صابره من يومِك وعَفِيَّه رغم البوم ... أنا بين فوارِسها باشوف النور والكلمه تِكْشِف طابِقْ المَستورْ نقدَرْ نشوف روحنا وساعتها – يا دكتور – ح تطبِّبْ جروحنا الصُبْح مشرَطْ والمِسا كِلْمَه بَسْ ان خَرَجتْ ف لحظه م اللمَه ؛ ما تلومش قلب بدور ! 00 *** تحية مباركة أخي الفاضل الشاعر الوطني إكرامي قوره دمت بخير وسلامة |
أما مماتك ..
زى عيشتك .. صرختين ما لهمش صوت وعشان تفوت " صهين " وإحساسك ونارك سكتة فى وسط السكوت اخفى الحقيقة عن عيون قلبك ودارى ف ساعتها تصدق لو تقول : شاعر أرارى !!! راااائع اكتشاف جديد د.إكرامي يكتب العامي جميل والله بارك الله فيك وفي الغالية د.حورية أختكما بنت البحر |
أخي الكريم ابا كريم حفظه الله ورعاه لو كنت تقدر تطنش .. .او حتى تنسى ملامحك كان قلبي برضه يطنش وممكن أقدر اسامحك لكن قلوبنا تعدت لحظة خصام الحبايب والكل فينا تملي مستني خله اللي غايب نفسي نعدي الحواجز تركب حصانك وتيجي وأركب حصاني وأجيلك نحرق جميع المراكب تحياتي لك ولأبداعك |
لكنْ مع كل الأسف
معرفش غير فى الطب حبة وحبتين شعر وأدب أما السياسة شرطها إنّك تكون لا شعر يا ابنى ولا أدب !! قسمة ونصيب سهمك يطيش .. سهمه يصيب تصبح مفيش .. يصبح أديب !! كما أنت مهر في طبك ماهر في أدبك جميلة هذه المحة التي استوقفتنا هنا تحياتي |
اقتباس:
يا حورية خارجة من بحور الشعر تتحفنا ببلاغتها كل البحور ندهت ولاغتها قالت قصايدك دهب مصبوغ بلون العرب مصبوب قوالب أدب ما احلا صياغتها .. أنا كنت واقف على الحياد شايف ملايين الجياد سارحين في مضمار التعب وبهية واقفة مطنشة وعيون قلوبها نعسنين شايفيين إيدين اللى قتل ومطنشين وكأنها نسيت ياسين !! وجريت معاهم من زمن قلبي اتخلع من كتر ما نهجت قصايدي بمدحها لكنها مش عارف مين بيحبها سايباني يا ستي باضيع وعلى كراسي الشعر حطت ميت وضيع وأنا اللى حابب تربها وأنا اللي راضع حزنها من يوم ما كنت ف حجرها عيل رضيع لكني هافضل كلمة الحق اللى مفروض إنها تخرج بقوة منها بركان غضب بيفجره حب ابنها |
إوعى تِصَدَّقْ يااللي قلبَكْ مِنْ دهب إن بهيّه راح تضيع أو إنها ممكن تبيع وِدْ الأصيل أو يوم تِميلْ لِلِّي مِهَدِّدْ أمنها يمكن تِبان كِدَه مِنْ بعيد لكن في يوم ما يكون بصَرنا كالحديد واضِح سَديد ح تشوف بصيرةْ قلبها *** تحية مباركة أخي الفاضل د. إكرامي دمت بخير وسلامة دمت مُبدِعاً مُبارَكاً |
اقتباس:
الرائعة المتألقة أينما حلت بنت البحر مرورك له مذاقه و ردّك النثري لا يفقد شاعريته تقديري وتحياتي |
| الساعة الآن 10:12 AM. |
Powered by vBulletin® Version 3.8.3
Copyright ©2000 - 2026, Jelsoft Enterprises Ltd.
جميع المواضيع والردود المنشورة في أقلام لا تعبر إلا عن آراء أصحابها فقط