بهو فندق ..
بلد غربي ..
في فصل الصيف ..
على ميعاد أوصدفة ..
جمع أجناس مختلفه ..
ولا فيهم أحد وافق ..
أحد ثاني ..
على تعريف للمنطق ..
بهو فندق .. فيه ناس مكتظة ..
فخامة تكسي الجنبات ..
نادل يحمل الطلبات ..
على أواني من فضة ..
هنا تجار يحكوا أسهم وسندات ..
هنا سمسار ..
هنا شاعر .. هنا بنيّات ..
هنا فلكي ..
هنا لاعب كره بارع ..
هنا فنان .. هنا متعهد السهرات ..
هنا يحكوا عن الأوضة ..
هنا يحكوا عن الموضة ..
هنا يحكوا عن السادات ..
وبركنٍ ما هو للصفوة ..
بجنب الباب ..
كرسين ..
حوار يدور بين اثنين ..
حيل أصحاب ..
ملامحهم تودي يم .. شرق أوسط ..
وهيئتهم .. وحالتهم .. بسيطة او بعد أبسط ..
* شف سايح من اليابان .. يداعب آلة التصوير ..
يغازل آلة التصوير ..
* سايح هذا يا غلبان ..
هذا السايح البارح ..
كانت صورته تحكي ..
في صدر الصفحة الأولى ..
يقولوا خامس أغنى شخص في العالم ..
وأظن انه .. وربي وحده العالم ..
جمع هالمال ةالثروة ..
من استيراد أو تصدير ..
نسى الكاميرا على الكرسي ..
* لا يا شيخ .. مثل هاذول .. ما ينسوا ..
* صدقني نسى الكاميرا على الكرسي ..
لا والله .. رجع خذها ..
* ظنك وين رايح ..
أكيد يزور له متحف ..
سخيف ..
هوايته أسخف ..
شفه .. مستني يمّ الباب ..
* وش ينظر ..
أظنه ينظر تكسي ..
ركب تكسي ..
أقول عدنان : فاخر حيل هالفنجان ..
خذ شايك قبل يبرد ..
* أقول أحمد : هذاك هناك .. هو من هو ..
* أي واحد ..
* هذاك اللي معه واجد ..
تخطرف انت .. أو عميان ..
هذاك فلان ..
هذاك اللي كلامه منتهى الحكمة ..
وجوده مثل غيث السحب ..
هذاك اللي لأجله ترخص أيامك ..
وتقضي النحب ..
هذاك اللي يهينك وانت تتلقى ..
اهانات بصدر رحب ..
هذاك اللي شعورك نحوه مبيّن ..
مزيج من الولا والحب ..
هذاك اللي اذا لا قدّر الله راح ..
يغطّي حزنك الدنيا ..
وتهمس .. راح ابن الـ.....
كذا يا أحمد ..
شايفني أنا .. منافق ..
أنا مسمع ولا اوافق ..
تظن اني بقلب أسود ..
* كذا يا أحمد ..
* لا تزعل .. أنا آسف .. أنا آسف ..
شف هذا خفيف دم ..
يضحك هذا .. من هذا ..
خفيّف دم ..
وبعطونه ..
* يعطونه ..
* يعطونه ..
ويرجع باكر لهذا .. يقطّع ذاك ..
يشرشح أصله وفصله .. بخفّة دم ..
* ويعطونه ....
* يعطونه ..
ويرجع بالأخير .. ضاحك على هذا ..
وعلى هذا ..
* أقول أحمد ظنّك هو رصيده كم ..
دقيقة صمت .. فرضها جيّة النادل ..
يشيل الشاي ..
ويقول ان العصير .. اللي يبونه لحظتين وجاي ..
شف شاعر ..
هذيك الحلوة تضحك له ..
* أي واحد ..
* شفه واقف .. يوقع دفتر لطفله ..
تخيّل يا خي يقولوا ..
بانه يشتري شعره من الشاعر ..
اللي الشاعر المشهور يكتب له ..
يا حظه .. وسيم مشهور ..
* يا ليتي أكون مثله ..
قوم نتصور معه ..
* نقوم نتصور معه ..
ما باقي سوى هاذي ..
نكبر راس هالمغرور ..
خفيف أنت .. وغبي أحمد ..
دايم فيك هالعلة ..
* أقول عدنان ..
ترى صاير طويل لسان ..
أحمد ياخي لا تزعل ترانا اخوان ..
تعوّذ بس من الشيطان ..
وأنا آسف .. وترى الدعوة سوالف ..
فخمة حيل هالكيسان ..
اشرب .. لا تزوّدها ..
ترى يبين عليك تعبان ..
شف مو هاذي صاحبتك ..
* هلا والله .. الا والله صاحبتي ..
تدري .. تموت هي فيني ..
* يا رجال .. خليني ..
خادعتك .. تراها والله خادعتك ..
* اقول أحمد : عشان انسرقت فلوسك ..
من زبيدة ..
صرت تشوف كل وحده ..
هي زبيدة ..
* يا عدنان .. خادعتك ..
أنا قصدي لمصلحتك ..
شفها تكلم الرجّال ..
أي رجال .. أخوها ذاك ..
يا عدنان .. خادعتك ..
أقولك ما تبي غيري ..
* يا عدنان .. طع شوري ..
مشاعرهم .. وهم .. كذبة ..
* احمد .. احترم نفسك ..
* افا عدنان .. تمد يدّك علي ..
وهذي السبّه ..
صفعه .. دوّت بركن .. (ططططططخخخخ )
قريب من هل الصفوة ..
عراكٍ في بهو فندق ..
جمع أجناس مختلفه ..
ما فيهم أحد وافق .. أحد ثاني ..
على تعريف للمنطق ..
خارج صالة الفندق .. شرطيين ..
يقودوا بالحديد اثنين ..
ملامحهم تودي .. يمّ شرق أوسط ..
وهيئتهم .. بسيطة أو بعد أبسط ..
كانوا أصحاب ..
في داخل ..
بهو فندق .. بلد غربي ..
في فصل الصيف .....