فى الميدان
خلق ياما قايمه وخلق نايمه
خلق بترسم وخلق تايهه
خلق عارفه وخلق مش عارفه
خلق بتقول وخلق ساكته
وايدين ع الوشوش
بس مش رايقه
وحرب ميكرفونات دايره
حناجر بتبخ سم فى نار قايده
تسمع هنا وهناك تقول
دى ناس فايقه ولا مش فايقه
ناس فى عشق الكراسي دايبه
تشترى وتبيع عشقها
رخيصه أوغاليه
وناس يا عينى اهى ماشيه
مع الماشيه
وناس فى حب الوطن هيمانه ودايبه
تقول اه عينى يا غاليه
خايف عليكى من سكه تايهه
عايزينك فى الصوره باينه
وخّفو علينا شويه
يا بتوع الكراسى الزايله
خفو علينا شويه يابتوع
الخطب الفايره
سيبو البلد لاجل ما تفوق
م .. السكة الدايره
عصام سالمان