[عُلا الياس]

الششبرك

المقادير : ( هاي بتكفي شخصين )
كاستين طحين .. كاسة مي مو ملانه فيها مدوبه نص معلئه زغيره ملح ، هاي العجينة
4 سنون توم متوسطات الحجم مبشوره ناعم ، شوية كزبرة أو بئدونس مفرومه ناعم ، هاي التئلايه
6 علب لبن رايب كامل الدسم ، معلئتين نشا تاعات الأكل مضروبه ع المولينكس ، هاي اللبن
ونص كيلو لحمة ، بصله كبيره مفرومه ناعم عليها فلفل اسود وملح فقط وانا بحط هيل مطحون هاي الحشوة
~~~
الطريقة :
هلأ بنحط الطحين وبننخلو بالمنخل ، وبنبدا نحط المي شوي شوي
بدنا العجين تكون صلبه شوي لكن مو يابسة
انا كيف بعرف انو سار تمام الوضع ؟
بس الجاط اللي بعجن فيه يسير كأنو ولا انعجن فيه نضيف بيلمع بتسير العجين تنضف عحالها !
متل هالصوره :

بنغطيها بنايلون وبنتركها ربع ساعه ترتاح ، بعد ربع ساعه بنرجع نعجنها وبنخليها برضو ترتاح ربع ساعه تانيه .
~~~
بنفرم البصله ناعم ، وبنحط اللحمه تتنشف تماما عنها المي وطبعا بنضيف الفلفل والملح
متل الصورة :

~~~
هلأ العجين جاهزة .. والحشوة شرحو ،

~~~~
بتفرد العجين على مكان نضيف مرشوش بطحين وبترئئها كتير ئد ما فيك
وبتئطعها بفنجان ئهوه
وبتحشيها بمعلئه زغيره لحمه
بتعملها هلال وبتشئلبها على بعض تتطبؤ من الناحيتين على بعضيها
بترصها بصينية مرشوشة طحين ، وبتحطها بالفرن تتنشف شوي بندون ما تتشوى او يتغير لونها الغايه بس تنشف تماما .

~~~
هلأ بتغلي اللبن على الغاز بعد ما تكون حطيت النشا
وبتسئط بس بيغلي تمام الششبركات
وبس تلت ساعة يغلو على بعض بتحطي التئلاي شوي تتئلب مع اللبن
وصحه شباب