مصر العزيزه أولا ً

[مسعدالنحلة]

مصر العزيزه أولاً
ـــــــــــــــــــــــــــ

المصري مش أبدًا جبان

ياما في وقت الشِده بان

ودي ميزه فيه مِتـْرَّسخـَه

موروثه عنده ومن زمان

أصليه مش مُسْتنسَخه

وقت امَّا يشعر بالخطر

هدِّد بلادُه بيتنطـَر

ويقوم يدافع ع البلد

وكإنـُه فيه شيء اتولد

إن كان فقير أو كان جعان

أو حتى مهدود من مرض

أو كان غني وقادر يعيش

من غير طابور في فـُرن عيش

الكل بيسيب الخلاف

ويدوروا ع اللِئتلاف

ويزيلوا أسباب الجفاف

وينادوا مع بعض بْهُتاف

( مصر العزيزه أولا ً)

والجمعه دى الكل اتفـَق

لازم يعَدُّوا من النفق

غصبن عن الناس الهَفـَق

ويحققوا لمصر الأمان

وكنيسه بالأجراس تدُق

ويأدِّن الجامع أدان

علشان يدور تاني المكن

ويكسِّبُوا الثوره الرهان

ويمرروا كل السُفـُن

م الأزمه دي لبر الأمان

الجمعه دي جمعة إراده

ومليونية الاتحاد

فيها يناير تاني عاد

وان حد كان شعللها نار

بالحِكمه تتحوِّل رماد

متدخلوش بيننا الكلاب

وسيبوها تنبح من بعيد

لموا حواليكو الشباب

وبلاش من الرأى العنيد

خلونا وبكلمة عتاب

نمحي حروف كلمة عناد

دا الرحله خطوه وتِنتهي

وقـُرُبنا جدًا م الهدف

ومكانـُه واضح واتعرَف

خلونا نوْصَل كلنا

بالشعب والجيش وبشرف

خلونا ندعي لربنا

إللي نصَرْنا بقدرتـُه

يمكن عشان بيحبنا

الثوره كانت ثورتـُه

مين كان يصدَّق إننا

نهزم نظام في سطوِّتـُه

عاوزين بقى شوية إيمان

ومعانا جاى رمضان أمان

عاوزين نكرَّس وقتنا

لله نصلي ونشكرُه

دا اللي يخافـُه ويتقيه

وبيتكِل دايمًا عليه

يطرح بركتـُه وبيلاقيه

ينفـُخ في صورتـُه وينصُرُه

ــــــــــــــــ

***********