مصير مصر ف إيدينا

[مسعدالنحلة]

مصير مصر ف إيدينا

ــــــــــــــــــــــــــــــــــ

مصير مصر ف إيدينا يا مصريين

وزى ما هيَّا شاريانا نكون شاريين

نبيعها ليه ومين يرضى يبيع بلدُه !

ولو دفعوا ف حِفان رملتها بالملايين

ـــــــــــــــــــــ

وفرصة عمرنا جايه على الطبطــاب

عشان نختار بحريَّه مِــن الأحـــزاب

لمجلس شعب أو شـُـــورى يمثلنــــا

ويقـْضِي ع الفساد والفِتنه والإرهاب

ـــــــــــــــــــــ

دا صوت الفرْد مِنينا ماهوش بالمـــال

وإلا نبقى نستاهــــل نكون أنـــــــــدال

لأن الصوت هيبني صرح مُستقبَـــــل

وأصبح حق للي جى من الأجيــــــال

ـــــــــــــــــــــــ

ومجلس شعـــب ننتخبُه من الثـُـــوَّار

يكون أعضاؤه كلتهـُم من الأحـــرار

وأصواتنا مهيش هترُوح لأى فلـُـول

وهتكون بس للأصلح وانا اللي اختار

ــــــــــــــــــــــــ

عشان يعْلـَىَ هرم رابع لهـذا العصــر

يكون شامــخ يعبَّر عن أصـالة مصر

وتحجز حته في القمــه تـُقف فيهـــــا

وتبني للي جاى ولبُكره كوبري وجسر

ــــــــــــــــــــــ

يا مصري صوتك الغالي بقى عالـــي

حرام الكشف من إسمك يكون خالـِـي

وتترك حق أولادك وأحفـــــــــادك

وإمسح م القاموس كلمِة وانــــااا مالي

ـــــــــــــــــــــ

بقالنا كتير بنتمنـَّى ضميرنــــــا يفــــــوق

ويبقى لصوتنا قيمه ومعنى في الصندوق

بقالنا كتير بنتهـــرَّب في الانتخابـــــات

لكين اليــــــوم بنستناها بس بشـــــــوق

ـــــــــــــــــــــــ

عشان عافين بأن العدل بقى مضمــون

وإن اللجنه رح تبقى مكان مأمـــــــون

ولو واحد رفض يبقالـُه رأى وصُــوت

يا إما يكون سجين الماضي أو مجنون

ــــــــــــــــــــــــ

ولازم كل واحد مـنـَّـا يبقــــى معــــــاه

يا فاس يا ترس وابنـُه ع الدوام ويَّـــاه

عشان يزرع ويصنع مصر ويعلـِّــي

رايتها وهوُّا مِتوكِـــــل علـــى مولاه

ـــــــــــــــــــــ

***************