ليه العداء فينا اتولد

[مسعدالنحلة]

ليه العداء فينا اتولد

ليه العداء فينا اتولد

وبقينا كل اتنين ضـَرَايِّر

إيه دا اللي حاصل في البلد

مش هيَّه دي ثورة يناير

ولا هُوَّ دا نفس الولد

ولا هيَّ دي نفس الشهامه

مش هُوَّ دا نفس الأسد

ولا هُوَّ دا نفس اللي قام

بالثوره في صبر وجَلـَد

دي وجوه جديده ماشـُفنهاش

يوم ما الميدان كله اتنسج

في توب قماش يومها اتفرد

نفس النقوش

فيها الوجوه متصوَّره

وكأنها نفس الوشوش

نفس الملامح والرتوش

نفس الهتاف

نفس المطالب

نفس بحْلقة الرموش

وعشان كدا مقدرشي يصمد ضدها كافة أحد

ولا حتى طـُغـْيان العروش

قابلوا الرصاص بقلوب شـُجاعه

مهمَّهاش كـُتـْر النعوش

كان يد واحده مبيخافوش

ملايين كتير ملهاش عدد

مِتوحِدين

ومحددين

نفس الهدف

مطلب كبير

ديموقراطيه وللأبد

ليه النهاره وجوه جديده

وناس جديده

سلوكها مش نفس السلوك

ليه النهارده الناس معارضه بعضها

وخناق مُهين زي الديوك

واللي يبُص ف وش أخوه مبيعرفوش

كان في يناير كله قلبه ع البلد

ميهمهوش لو ينضرب أو ينجلد

دخل الميدان ومهمهوش

وأصر على حُريِّتـُه

وبصوت قوى قال كلمته

ضحَّى بشبابُه ودنيتـُه

قدِّم لبلدُه كام شهيد

في يوم عظيم اختارُه عيد

عيد ثوره قادره وملهِمه

بس النهارده الصوره باهته ومُعتِمه

والصوره عندي مسجله

فيها عيال مِسترجله

شايلين قزايز تشتعل

شايلين حجاره وطوب ف إيد متدلدله

وعيون لئيمه مفنجله

بيهددوا كل البيوت

حتى وهيَّ مقفـِّله

أو يحرقوا ف السيارات

جوَّا الشوارع والحارات

عربيه لمواطن بسيط

مركونه وسط المركونين

من يوم ما بالقرض اشتراها

ولسه برضك مستدين

محتار يروح يشكي لمين !

كل اللي يقدر يعمله

يلجأ بوشه للسما

وبهمْس يدعي لربنا

ومن عينه نازل دمعتين

أو تاكسي ماشي في أمان

وصاحبُه راجل عندُه دين

قام يشتغل زي امَّا قالـُه ربُه رب العالمين

يسعى للقمه للعيال ويجيبها من عرَق الجبين

وبكل إذلال وامتهان

يكـْسَر قِزازُه الموتورين

إللي مهماش م الشباب

لكنهم من جنس تاني من البشر مش معروفين

علشان يخلـُّوا ناس مكافحه بكدها

وبجهدها

وبوقتها

علشان ولادها المحتاجين

مستنيين

تدخل عليهم لقمتين

لاكنها

ترجع بيوتها بدمعها

والقلب مش راضي وحزين

اتجمعوا كام ألف واحد في ميدان العباسيه

معرفشي أصلا جُم منين

أو متوكلين من عند مين

علشان يقولوا كلام غريب

رافضه جموع الأغلبيه الصامتين

يبقى الكلام دا بإسم مين ؟

بسلوك مُريب

عاوزين يروحوا للقياده يهددوها بكلمتين

مستأقصدين

مستأسدين

مش حُسْن نيه

علشان يثيروا الجيش ويضرب

كام عيار بالمدفعيه

والدنيا تبقى معجنه

والناس تكون هيَّ الضحيَّه

والصوت يكون للبندقيه

لكن أصابع لاتهام بتشير إلى الأيدي الخفيَّه

إللي بترسِم ف الدِرا

ويحركوا ناس مدسوسين

ويولـِّدوا أزمة ثقه بين العساكر والشباب

ويشعللوا نار الفِتـَن بالكِدْب بين أهل الكتاب

وامَّا بلدنا تستوي ويحوم حوالينها الخراب

يظهر أعادينا اللي خبوم وشهُم تحت التراب

ويهوهووا زي الكلاب

ويبيعوا فينا ويشتروا

ويقسِّموا العجل السمين

يا مصري قوم صحصح

عشان تفضح مساعي الطامعين

وان كان إلاهك مُستعان

دايمًا تكون بيه مُستعين

وافسِد خطط مِتخططه

واضرب فلول المخلوعين

وحِّد على الكون كلمتك

واقلع هدوم المخدوعين

وانسى مواجع آلمتك

طلع كنوز من جُعبتك

فيها خـُلاصة حكمتك

واعمل بإيد واحذر بعين

واصل مسيرة ثورتك

على سكه مش على سكتين

لملم وصلح فـُرْقِتك

واتحدَّىَ إبليس اللعين

كوِّن بسرعه دولتك

وانسى مسائل خلـِّتك

تبقى فِرَق مِتشتتين

وامسِك في حبل اللهْ المتين

واسرع شويه ف خطوتك

واجعل تـُكالك ع المُعين

ــــــــــــــــــ

**********