عودة الروح للبوليس

[مسعدالنحلة]

ـ
ـ
ـ
ـ
ـ
ـ
ـ
ـ


عودة الروح للبوليس

ـــــــــــــــــــــــــــــــ

عودة الروح إمتى ترْجع .. للبوليس والأمن تاني

دا الخطـَـر أصبح بيوْجَـع .. والبلد بقيِّت تعانــي

شـُرطه في الأزمات بتِخلـع

واللصوص ماشيين تبرْطع

والجريمه بقِت بتطـْلـَـــع .. م البدايه مالها جانـي

ــــــــــــــــــــــ

البوليس والشـُرطه لازم .. يرْجعوا يمارسوم عملهم

م اللـــــوا لحد المُلازم .. والعســـــاكِر قبل منـهـُــم

بعد ما زاد الجرايِّــــــــم

والبوليس في الخــط نايِّم

والبلد نازلين شتايِّم .. ف اللي طنـِّش عن أمانهــُم

ـــــــــــــــــ

دا البلد قـــامت بثــوره .. ضد طـُغـْيان الفســـــاد

كان حقيقي مش مغامره .. أو مظاهرات وانتِفاض

ليه يقابلوها بمُؤامـــره

والخيانه فيهـا غامــره

والأيادي لونها حمـــرا .. من أثــر دم الـــــولاد

ــــــــــــــــــ

يبقى دي كانت خيانه .. من نظام فاسد وفاشـــل

والعساكر من حـــدانا .. من قـُرى أغلبها جاهـل

بس نشهد بالأمانــــه

بالقلوب كانوم معانا

أصلهــا كانت أوامِر .. م الوزير ابو قلب خامِـل

ـــــــــــــــــ

والوزير مسجون وقاعد .. في اللومان مستني دُورُه

ويَّا كام رُتبة مُساعِــد .. في المجــازر أدَّى دُورُه

كان أمَـر بالقتل عامِــد

ضد شعب بقلب جامِـد

واللي كان أعزل وصامِد .. يلتقي الطعن بْصُدورُه

ــــــــــــــــــ

وابتدا شغل المحاكــم .. والمحامي والنيابــــــه

والقانون في النور يحاكم .. الرئيس ويَّا الديابه

اللي كان عاملينها غابه

في بلد أصبح خرابــــه

واللي عامل نفسه حاكم .. كان حاكمها بالخيابه

ـــــــــــــــــــ

بس يا شـُرطه النهــارده .. البلــد قامـت بتبنــــي

والكتير بالثوره عدَّى .. بس لازم وضع أمنـــي

ليه إيديكي ف ميَّه بارده

ليه دماغك ع المخـــــده

قومي ياللا وشدِّي شدَّه .. خلـِّي ثورة مصر تِجنِي

ــــــــــــــــــ

نِفـْسِنـــا روحِـك تعُـــود .. ويبقى بيكي أملنا زايِّد

والأمــان يرجع يســـود .. والمنار لولادنا قايّـــِد

وازرعي شوية ورورد

كل ورده يشيلها عُـــود

يرْفعُـــــه كل الجنـــود .. ع المحبه يبقى شاهِد

ــــــــــــــــ

**********