*** أُغنية (انا حسنى) دويتو للرئيس/شعر/جمعه محمد***

[جمعه محمد يوسف]

انا حسنى ومبارك إسمى
وعلاء وجمال دوا أنجالى
وسوزان تبقى رفيقة عمرى
عشت معاها احلى ليالى
مره قالتلى يا واد يا حُسنسُن
إنت كبرت ولازمك راحه
ايوا يا بيبى بحبك طبعاً
لكن اقولهالك بصراحه
لو ع المال نغرف ونعبى
واهى أرضك بالخير طرّاحه
بس العزبه تسيبها لأبنى
واد جاهز وبكل بجاحه
راح يتَّنك كده ع الكرسى
ويدلدل رجليه بالراحه
قُلت إيييييييييييييييييه:
قُلت كلامك صح يا سوزى
والله عليكى يا بت نصاحه
فكره إزاى كانت هتفوتنى
وانا عندى المحروس ف الساحه
من بكره هيحل محلى
ونمهدله ونرتبله
بالمفتاح أو بالفتاحه
هى ضرورى تكون من حقه
عزبه وكانت ملك لوالده
واللى يزرجن أو مش عاجبه
راح نقلب افراحه مناحه
إيه رأييييييييييييييييييك:
تسلم ليا يا سونا يا سونسن
رتب اوراقك واتفنن
خليك ثابت خليك جامد
اية يعنى لو الشعب اتجنن
حبة كدب وحبه فصاحه
على حبة تزوير ووقاحه
اقلب وش وبدل وش
كله يخاف كله يكش
كله يا سونا ينام ف العش
والواد طبعاً وحده يقش
قلت اييييييييييييييه:
يسلم مخك مع تفكيرك
كنت هعيش ازاى من غيرك
والله يا سوزى عليكى حاجات
يخرب بيت عقل الستات
حكمه قديمه قالوها زمان
ورا كل العظماء نسوان
يقروا الكف مع الفنجان
يبنوا صروح ف الهوا طرّاحه
( وبعد قيام الثورة)
شايفه يا سوزى الشعب اهو ثار
شكله بجد ومش بهزار
ومكمل لاخر المشوار
يادى الخيبه ويادى العار
حتى الملك ياسوزى اهو طار
رحت ف داهيه يا سوزى عشانك
وعشان خاطر ننوس عينك
رحت ف داهيه يا سوزى عشانك
وعشان خاطر ننوس عينك
بقلمى / جمعه محمد
حاولت الاختصار فى اضيق الحدود
عذراً للاطاله