ــــــــ الوعد ـــــــــ

وعدي لك نقي وصافي
وأرياف في طية أرياف
لكم جافي يا أولافي
ولاف عاشق في غلا أولاف
رحال نطوي في مسافات الزمان وجايكم
وما زال في عقلي دلال لرايكم
ونودكم
ونعدكم
ونجيبكم
غالي علي سريبكم
وغالي عليكم من غلاي غلاي
غالي عليكم في الرفق تبقوا معاي
نحن على طول الطريق
خطواتنا ود وعفا
نحن رفيق رافق رفيق
ما حد باخل بالدفا
وحق من خلق ليل وبحر وأمواج
وخالق الحاجة وخالق المحتاج
نحتاج لك
حاجة أوصافك يألفن ود المدامع
نحتاج لك حاجة أريافك في الجدب برقي اللامع
وحاجات محتاجات
وحاجات لهن بالذات
حكاية غلانا وأنت
والغلا وطيب الرفق
وهمسة لقانا وأنت
والرجا وحلم وعشق
ما يخطر الآخر إلا بالآخر
شايل وفا .. و . ود الحنين الزاخر
وأمواج من دفق الحنين
ودموع في الليل الحزين
وين ما علي تغيب
نحس روحي في الحياة غريب
تسيل دمعتي

وين ما تغيب علي
نحس روحي في الحياة شوي
يجي الكيد ع الدمعة ومكره في
نأخذ الليل نكمله تسكيب
الدمع يهنا وعزمنا .. لا شي
وصبحنا المفارق ما يبان علي
نبقى بروحي بين مني و.. لي
يخطر سريبي يبان فيه سريب
وذكرى .. وضحكة .. وملاقا ندي
ودمعة وكلمة للسماحة تجيب
يبقى غيابك وإحتمال تجي
تجي أيامي في ربيع خصيب
في حلم عيني وخاطري ويدي
تلمس ايديك وتحس اللهيب
وين ما علي تغيب
نحس روحي في الحياة غريب
تسيل دمعتي

وين ما يغيب خيالك
وتغيب علي روعتك ودلالك
ننشد عليك وخاطري في سوالك
وداد جايب في ذرا حبيب
نشيد خاطري ..... وفي خاطري موالك
وطيفك يلازمني بشكل عجيب
مشتاق لك في ليل مظلم حالك
شكواي تسمع غربة التغريب
وإن كان في موحك نجي في بالك
تحمل النار وقسوة التعذيب
لا تراودك ... لا تراود إحتمالك
حكاية إني ننساك أمر صعيب
وين ما علي تغيب
نحس روحي في الحياة غريب
تسيل دمعتي

وين ما تغيب عيونك
علي .. ويظلم العالم دونك
نحس روحي نجم خارج كونك
رحال تايه في فراغ رحيب
وفيك سماح غفرانك يجيب
الروح نشوة .. وتزدهر في عونك
والشوق يحضر في موكبي مهيب
يجيبك حلم .. وتجيبني ظنونك
نرسم حلم والملقا نصيب
وإن صار يا مولاي هونك
دمع العين والصبر الرهيب
ردود كفاك خايل كيف لونك
مني فيك
ما يصلك العيب
وين ما علي تغيب
نحس روحي في الحياة غريب
تسيل دمعتيِ