أخبار تحزِّن يوم العيد

[مسعدالنحلة]

ـ
ـ
ـ
ـ
ـ
ـ
ـ
ـ

أخبار تحزِّن يوم العيد

ــــــــــــــــــــــــــــــــــ

جه يوم وشفنا المهزله .. واللي مشفشي بعينه سامـــــع

الحاله صارت هرجله .. وحروب بقت ماليه الشوارع

يا مصر إيه المُشكلـــه .. النـــاس بقـــت ليــــــه بالبلا

والصوره ظهرت مخجله .. فيها الجميع نازل يصارع

ـــــــــــــــــــــ

بلطيم غزاها وبالســـلاح .. من منطقة سوق التـــــلات

ناس جُم ودخلوا بالاجتياح .. وكأنهـُـم جُـــم م الغابــات

وعدد كبير ف العركه راح .. غير دم نازف من جراح

الحرب سِهـْرت للصبـــاح .. ولحد ما كتير فيها مـــات

ــــــــــــــــــــ

غير حرب دارت في سوهاج .. ما بين قبايل قريتيــن

فــــي كل قريــــه الكل هاج .. والولعه بقيت ولعتيــن

دبحوا العيال زي النِعــــاج .. والدم زى المَيَّه مــــاج

وبدال ما عيد يبقى ابتهاج .. قضـُّوه في دفن الميتيــن

ـــــــــــــــــــ

أمَّا الصراع اللي ف قنا .. عيلتين وكان بينهم خِـلاف

شغال بقاله كام سنــــــه .. والقتل فيـــه كان باحتراف

نصَبـُــوا لبعض الأكمنه .. بالرشاشـــات مِتأمِّنــــــه

والعيد قضوه في محزنه .. والكل سد الباب وخـــاف

ـــــــــــــــــــ

حتى الخناقه وضرب الطوب .. بين الأهالى في الفيـوم

كان السلاح فيها المركوب .. وبكام عصايه وحبة شوم

والكل فيها كان مضروب .. حتى اللي كان منهم محبوب

لا فيها غالب ولا مغلوب .. بس الجميع عيِّد مهمــــــوم

ـــــــــــــــــــــ

أما اللي طلعوم بالألفين .. هاجمين على القسم ف دمياط

النار ف عينهُم ومصرين .. يكسَّروه فيــــــه الظبَّـــــاط

ويحرروا منه المساجيــن .. محكوم عليهم حُكـْم سنيـــن

كانوم بيتعاطوا الكوكايين .. والأهل ساقوا ف لاستعباط

ـــــــــــــــــــــــــ

أخبــار تحَزِّن يوم العيد .. وتخلي أعصابنـــــا بتنهــار

ف قلوبنا كان الغم شديد .. في يوم كئيب ما طلعله نهار

نار الفِتن كانت بتقيـــد .. وحروب ما بين الناس بتزيد

خلـِّت بلدنا ف شكل جديد .. وكأنهــــا بلاد الأشــــرار

ـــــــــــــــــــ

************

[(مها ضرار)]

واضح كده يا أستاذ مسعد ................ إن الحكايه فيها انتخابات
و عشان مافيش واسطه بتسند .......... قضوها بقي ضرب و حركات
شوف كام سنه كام متعود .............. يقف بسنجه يجيب أصوات
و يجيب صناديق و يسود ................. و لا فيش رقابه و لا حكومات

و الإخطبوط كان م الوطني .................ظبط هنا و هناك عائلات
و فـ كل عيله فيه قُرني .................... خدام بتاع فلاح و فئات
عامل بُرم و سط بلاده ................... في القبه يبقي من الأموات
دلوقتي جاي يعمل مدني ............... و يدس سمه مع الدايرات

و في يوم طلع له شباب ثوره ............. أحزاب كتير و كمان قايمات
قال يا أمه فيه إيه و إتلخبط ............... أحزاب كتير من غير حسابات
قام لمّ عيلته و أعوانه ..................... خلصها ضرب كده و خناقات
و القصه متعاده و دايما ................ سبب المشاكل الإنتخابات

كان وطنه مسجون في الوطني ............. كان وطنه وثني و مش بيقوم
و الديراه كانت علي قده ..................... و لا كانش حد في يوم بيدوم
هوه اللي بس عليه الدور ................... شاف البش مالهمش لزوم
من جهله قال إنه العارف .................... زي الكلاب أصبح بيزوم
أخي العزيز و أستاذي القدير \ مسعد النحله
سامحني لإقتحامي و اسهابي في الرد
و حضرتك تعلم كم يأخذني القلم و يضطرني للبوح عندما أقرأ لك شيئًا
الموضوع مهم للغايه , و أشكرك علي جهدك في تأريخ الأمور و جمعها في صيغة شعرية رائعة
دائما تستوقفني أشعارك بإسلوبها الراقي الجذاب
دمت لنا شاعرًا عريقا يشدوا بأجمل النغمات في حب الوطن و من أجل الوطن
تحياتي