يا حمام السمسمِيَّه

[د. حورية البدري]

الجبل مِ الحِمْل هَدَّى
والأعادي راقْمَه هَزيمتنا لإخواننا بْمَوَدَّه إصطناعي
والتَداعي ساحِب الأحداث لأسفل سافِلِين
فَرَّجوا بأفعال رعونتهم عَلينا العالَمين

رَبِّ يِصْلِح حال بلادنا
والشعوب تِدرِكْ وتفهَم
إن من صارِع على السُلطَه أناني
مُنيتُه لو في التدَنِّي حَ يواتيها

الشعوب لو بَسْ تفهم
تمحي عن عينها الغَشاوَه
تعرَف الأخ الحَقيقي
م المُزَيَّف اللي ضامِر في ابتساماتُه العَداوَه !

يا حَمام رفرف عليهُم
رُد غِنوِتهُم إليهُم
إحتمال الغنوَه تِكشِف
إحتمال النَخوَه تِنهي من القلوب فِعْل الغَباوَه

[د. حورية البدري]

البُكا غالِب عَلَيَّا
لَمَّا أصحاب القَضِيَّه
والأَمَل لِلأُمَّه دِيَّه
يِبقوا أعداءها برعونه
ويخونونا
يِكسَروا النور اللي هالِلْ
قبل ما يِوْصَلْ إلينا
...
السِلاح مَسئول في يَدَّك
تِحمي بيه الأَقْصَى وأَرْضَك
تِحمي بيه في الشِدَّه عَرْضَك
والعَدو مَعروف وشايفك
...
إيه جَرَى حَوِّل سِلاحَك
لَوِّث الصَفحَه في كِفاحَك
خَلاَّ إجرامَك وشَرَّك عَ الحبايب
خَلاَّ سَهْم الغَدْرْ صايِبْ
واللي مَضروبْ واللي ضارِب إمَّا خايِبْ
أو إيمانُه بالقضِيَّه فِعْل ماضي
..
لا حَقول إسمَك وإسمُه
وانسَى م الكُراسَه رَسمَك وَيَّا رَسمُه
والتِفِت أبحث عن الحُرْ اللي اقاسْمُه
حِلم عروبتنا الأَبِيَّه
أَنتِفِضْ مِ الوَكْسَه دِيَّه
...
إنت فين يااللي انت غايب
إحتمال إسمَك مُريد
مَروان
وسيف الله .. اللي ما يِطْعَن حَبايِب !
إحتمال إسمك سَلام
إحتمال ..
بَسْ الكَلام أَصبَح بيِوجَعْ
فاحتمل صمتي
وإِسْمَعْ صوت حمام السمسميّه
اللي بِيْنَوَّح
ولكن تِسْنِدُه
نَدْهَه مِ القُدْس العَفِيَّه
رَغم دِي الخيبَه القَوِيَّه
سامْعَه صوت " الله أَكْبَرْ "
يِهْزِم الضلمَه الرَدِيَّه
في قلوب صابرَه وأَبِيَّه

[د. حورية البدري]

يا مَا غَنِّيتْ للفَوارِس
اللي لِيهُم قَلْب حارِس للقضيَّه
قلب حاسِسْ بِالبَلِيَّه
...
واللي قبل الخطوَه
كانوا
يِسْتَعيذوا مِ الشيطان

النهاردَه صَبَحوا يِسْتِلِبوا الأَمان
وبسلاحهُم يقتِلوا روحْهُم
وأعداءهُم بِتِضْحَك بامْتِنان

إحتمال وَزِّةْ شيطان
إحتمال لَحْظِة جِنان
واحتمال ...
إحتمال إن المَصالِحْ هِيَّ هَدَفهُم في الميدان

إحتمال
بَسْ المُؤَكَّدْ
صابِتْ الضَرْبَه الرَدِيَّه
الصَديق وَيَّا القضِيَّه
والوَطَن حَزنان بِيِبكي
يِمْتِزِج دَمْعُه بدموعي
عَ الفُراق
عَ العَداوَه والتَشَتت
والعَدو تَحتَكْ يا أَقْصَى
ماسِك الأزميل / يِفَتِّتْ
صُلْبْ أيامنا اللي جايَّه
والحَمامْ هاجِرْ وبَعَّدْ
رافِض الضَلمَه الغبِيَّه
مُنتَظِر لو نور يِشَقْشَق
إحتمال يِقْدَرْ يِعاوِد
وَيَّا لَحْن السِمْسِمِيَّه

[د. حورية البدري]

كان حُمام السِمْسِمِيَّه
قلبُه يِفْرَحْ إذا غنَّتْ حَماس بالبُندُقِيَّه
النهاردَه ؛ قلبُه يِرْجِفْ
لو شيطان الحُر يِغلِبْ عَزمُه في الرِحْلَه
تِتوه مِنُّه القَضِيَّه
..
النهارْدَه قلبُه خايِف مِنُّهُم
خايف عَليهُمْ .. كُلهُم ..
م اللي جاي
لَمَّا يِعْمَى قلبُهُمْ
تِصْبَحْ دِماهُمْ تحت أقدام العَدُو
سَهْلَه وسَخِيَّه
..
والحَمام يبكي على الكِلْمَه اللي قالها
قبل سابِق
في أغاني السمسميَّه
عَن حَماس حُرَّه أَبِيَّه !

[د. حورية البدري]

الحروب دايماً محاوطه حلمنا
حتى في وَهم السلام
الحروب ممكن تعادي بالكلام
واستلاب الحَق أصبَح سَهْل جِداً
لا لُه رادِع
أو عَداوَه انشالَّه حَتَّى بالخِصام !
..
إحتمال الضيق بيعرَف سِكِّتُه لقلب الحمام
يُصْبُغ الدنيا بغيامَه أو عَتام
بَسْ بَعْدُه الفجر ممكن يِنْبِلِج
والقناديل الأماني تِنْسِرِج
والحَقيقه تِنْطِلِق
زَي سِرْب حمام في مَكَّه
قلبي كان طايِر معاه
بَسْ شَكُّه الظُلْم شَكَّه
غَنَّى وَيايا الحمام ع السمسميَّه
قال لي يا حُرَّه ارجَعي
واستفتي قلبِكْ
قُلْت كانت ساكنه فيه كُل الفصايِل والأماني العربيه
روح حماس اللي على الأعداء قَوِيَّه
والرِجال اللي بمروءتها أَبِيَّه
..
رَبِّي يِصْلِح حال قلوبنا
حال ضمايِرنا النَقِيَّه
..
الأدان م القُدْس نادَى ؛
فين وِلاد أُمِّةْ مُحَمَّد
اللي رُحَماء فِيما بينهُمْ
واللي ع الأعداء عَفِيَّه
فين ولاد أُمِّة مُحَمد
اللي قادرَه تِكْسَر الغُمَّه
وتُخْرُج يا وَطَن مِنْ دِي البَلِيَّه !

[د. حورية البدري]

الحروب دايماً محاوطه حلمنا
حتى في وَهم السلام
الحروب ممكن تعادي بالكلام
واستلاب الحَق أصبَح سَهْل جِداً
لا لُه رادِع
أو عَداوَه انشالَّه حَتَّى بالخِصام !
..
إحتمال الضيق بيعرَف سِكِّتُه لقلب الحمام
يُصْبُغ الدنيا بغيامَه أو عَتام
بَسْ بَعْدُه الفجر ممكن يِنْبِلِج
والقناديل الأماني تِنْسِرِج
والحَقيقه تِنْطِلِق
زَي سِرْب حمام في مَكَّه
قلبي كان طايِر معاه
بَسْ شَكُّه الظُلْم شَكَّه
غَنَّى وَيايا الحمام ع السمسميَّه
قال لي يا حُرَّه ارجَعي
واستفتي قلبِكْ
قُلْت كانت ساكنه فيه كُل الفصايِل والأماني العربيه
روح حماس اللي على الأعداء قَوِيَّه
والرِجال اللي بمروءتها أَبِيَّه
..
رَبِّي يِصْلِح حال قلوبنا
حال ضمايِرنا النَقِيَّه
..
الأدان م القُدْس نادَى ؛
فين وِلاد أُمِّةْ مُحَمَّد
اللي رُحَماء فِيما بينهُمْ
واللي ع الأعداء عَفِيَّه
فين ولاد أُمِّة مُحَمد
اللي قادرَه تِكْسَر الغُمَّه
وتُخْرُج يا وَطَن مِنْ دِي البَلِيَّه !

[عيسى عدوي]

يا حورية ..
يا عروس إسكندرية
الحمام نايم وغافي
والمراكب في المرافي
حاملة من كل المصايب
اللي باين واللي خافي
واحنا لسه
قلبنا بينأح علينا
شفنا خيبتنا بعينينا
لما كان الأخ منا
يجرح الأخ بعناده
يذبحه ييتم ولاده
والعدو واقف وشايف
حامل سلاحه ويضحك
فاكر إن إحنا انتهينا
وإحنا فعلا إنتهينا
قلبنا ما عادش صافي
يا حورية
يا عروس اسكندرية
والحمام عدا علينا ..
شاف بلاوينابإيدينا
رف رفه وطار ..
بعيد من غير ما نسمع
منه لحن السمسمية

مع أطيب التحية للأخت الكريمة الحاجة حورية

[د. حورية البدري]

المِحَن عارفه طَريقها
تترك الديب والعَتامَه
وتهاجمنا
عاوزه تنهي من نهاراتنا شروقها
...
مِحنه ح تفوت زي غيرها
والساعات ع الليل تِعَدِّي
تتبدل بشروق نهارها
رَغم كُل جروح بلادنا
رغم دم الحُر
لكن ..
قلبنا شايل لبُُكْرَه مِن إيمانُه أمل يزورها

**

دُمت بخير وسلامة أخي الفاضل عيسى عدوي

ودام الإبداع والحضور الجميل

تحياتي

[إياد حياتله]

ما تخافيش يا حوريّه
ما حصلْ
كان لا بدّ في يوم هيحصلْ
والبطلْ
هو ياللي بكره يفضلْ
ماسك بإيده الهويّه
الرصاص
والبندقيّه

[د. حورية البدري]

الرصاص والبندقيَّه
والإيمان بالله يسَدد
توصَل الضربه لصاحِبها
اللي غاصِب أرضِنا وآسِر صحابها !

ربي يصلِح حال عِبادُه
لجل ما يشوفوا مُرادُه
والعتامه تفوت عنين ويزول ضبابها

***
دُمت بخير وطيبة أخي الفاضل إياد حياتله

ودام الأمل نوراً يُحيي الخير في الغد بإذن الله

تحياتي

[د. حورية البدري]

مَهما طال الليل حَ يِمْشي
والأَمَل حَيعود إلينا
تِضحَكْ الفرْحَه ف عنينا

والأمَل بالله بِيِحْيى
رغم كُل الضَلْمَه
لكن ؛
نِجْمَه صاحيَه !

[راحيل الأيسر]

ثنائية جميلة بين الدكتورة الحورية
والدكتور العدوي ..



بوركتما ، وطبتما أين ما كنتما