خيمة الذكريات الرمضانيّة ..::.. مع أبو عاطف ..::..

[إياد حياتله]

صور من مخيّم العائدين الذي أحدّثكم عنه ... سوريا .. حمص

[إياد حياتله]

تابع الصور، والأكيد أنّها أخذت في مرحلة أحدث عن التي أكتب عنها

الشاعر والمغنّي الشعبي أبو عرب



أم العبد .. أخت أبو عرب .. وخالة أم عاطف

[إياد حياتله]

مخيّم العائدين 3

ومع هيك ، كانت عيشة المخيّم حلوة ، ولكو إيه ... الله وكيلكو حلوة ، بالرغم من الشقّا والبهدلة والقرف والتعتير والمشاكل والفقر ، والله كنت تلاقي العالم مبسوطة وقنعانة ، رظيانه بالمقسوم وفشّ إشي منّكد عليها غير هاللجئة بنت الكلب ، وما عدا هيك كلّو لأجل عيون الوطن بيهون ، دفا وحنّية ، وحيطان مسنودة على بعضها البعض ، الجار ينادي على جارو من جوّات الدار ، وأبواب مفتوحة للرايح والجاي ، حتّى الأبواب المسكّرة كان في إلها سقّاطات ، بيكفي ترفعها مع كلمة ( يا الله ، وينكو يا أهل الدار ) وتظلّك فايت ، أصلا بأيّام الصيف تلاقي العالم قاعدة عالعتبات طول النهار ، تعزم على كل من هبّ ودبّ ، كبّاية شاي من هون ، وفنجان قهوة من هناك ، موّال وبيت عتابا وسوالف عن أيّام البلاد بتخلصش ، وراديوات مفتوحة على إذاعة لندن ، بتستنّى بشي خبر حلو ، فش هاظا إلي وهاظا إلك ، الكلّ عايشين على قلب واحد ، الفرح فرحهم والهمّ همّهم ، بالعرس الجميع يفرحوا ويدبكوا ، وتلاقي ظحكة الواحد فيهم شبر ، وبالعزا الكل زعلان ومتأثّر ، وبوز كل واحد فيهم شبرين ، تقول الميّت أبوهم وللا أخوهم .
يعني اللّي تهاوشوا على عين الميّ ، وكبّوا تنكات بعض عالأرض ، ويمكن كسّروا الجرّات كمان ، وسبّوا وشقّعوا وما خلّوا فِعِل وتِرِك وستر مغطّى على بعضهم البعض ، ولعنوا سنسفيل أبو جدود عيلهم وعشايرهم ، ونشروا غسيلهم الوسخ قدّام اللي بيسوى واللّي بيسواش ، كنت تلقاهم بعد نص سيعة يتصالحوا ويتباوسوا ويحبّوا على روس بعض ويعبطوا بعض كمان ، ويرجعوا وكأنهم عزّ الأحباب والأصحاب ، تقول ما صارش بيناتهم إشي أبدا ، راجعين سوا من الميّ ، يتساعدوا بحمل التنك والجرار ، يتمازحوا ويتباسطوا ويحلفوا على بعضهم البعض على شاي وقهوة .
وظلّت حكاية الميّ وطوشها هيك حتّى صار إلها حلّ أيّام الوحدة بهمّة حياة جدّي أبو هويّن وتمدّدت المواسير على كلّ البيوت ، بس الكهربا توخّرت شوي
عيشة بسيطة ، وعالم بسيطة كمان ، زلم تسري من قبل طلعة الضّو على أشغالها ، إشي بالبساتين ، إشي بالعمار والطوبار ، إشي بمعمل السكّر ، إشي بمعمل الغزل والنسيج ، ما كانش في باصات تفوت عالمخيّم وقتها ، واللّي بدّو يروح مشوارو ، لازم يمشي لطريق الشّام عند الطرمبة ليركب بالباص أو بالسربيس ، وكثير من العالم كانوا يوخظوها مشي ، إمّا من طريق البلد ، أو من جهة الحَمَار على طريق بابوعَمِرْ ( أقرب ضيعة حمصيّة عالمخيّم ) .
الأولاد والبنات تروح عالمدارس الإبتدائية تبع وكالة الغوث بالمخيّم وهي لابسة المراييل السّودا ، وكانت أوّل مدرسة هي إبتدائيّة الشجّرة ( بلدنا ) أمّا الإعداديّات ما كانتش موجودة بالأوّل ، وكانوا طلاّبها يضطرّوا يروحوا على مدارس الحكومة بالبلد ليقروا .......

[إياد حياتله]

مزيد من الصور من مخيم العائدين

تابع مخيّم العائدين

[إياد حياتله]

مخيّم العائدين 4

هاظا يا مرحومين الوالدين ، أوّل إشي بتقدروا تقولوا إنّو موقع المخيّم المنعزل خلّى مايكونش في علاقة مباشرة وإحتكاك يومي مع الحماصنة ، لأنّو المخيّم مش موجود في منتصف طريق ، ولا بيوصّلش بين منطقة ومنطقة ، معزول ومتطرّف لحالو ، ويمكن كثير من العالم بالبلد ما سمعتش فيه أصلا ولا بتعرف إنّو في إشي إسمو مخيّم ، لأنّو ما حداش بيمرق منّو مرقة طريق ، وما حداش بيروح عليه بالصدفة ، وما حداش بيدخلّو إلاّ ياللّي قاصدو ، والسكّان كلّهم لاجئين مشحّرين فيهمّش ولا واحد غريب ، يعني حمصي
ومع هيك كان في تعاملات وعلاقات ممتازة بين أهل المخيّم اللي ظروف عملهم خلّتهم يتعاملوا مع أهالي البلد الأصليين ، ولله والتاريخ لازم نحكي الحقيقة هون بدون زيادة ولا نقصان ، أهل حمص من أطيب البشر ، وأكثرهم طيبة وأخلاق ونخوة وشهامة ( ولا تزعل يا أبو حلب ، كل إخواننا السوريين طيبين وأولاد حلال ، من حوران لمنبج للجزيرة للساحل ، والله كلّهم بينحطّوا عالجرح بيشفى ) بس مرجوعنا للحماصنة ، لازم نعترف إنّو النكت اللي بتطلع على جدبتهم ما إلهاش أصل أبدا أبدا ، فهم مجاذيب مش مجاديب ، يعني يجذبوك بلطف معشرهم وجمال أنفسهم وكرم سجاياهم وبدّي أعطيك أمثلة على هالحكي حتّى ما تقولش أبو عاطف عم بيخرّف ، هاظا قبل ما ينبنى المخيّم ، كثير من اللاجئين توزّعوا على مطارح مختلفة بالبلد ، إشي سكن بقرية جنب حمص إسمها الضبعة ، وعالم سكنت بالخالديّة ، اللي هي حارة ورا جامع سيدنا خالد ، وعلى الأغلب إنهم سكنوا أول إشي بالجوامع والمدارس ، وبشهادة الجميع كانوا الحماصنة يعاملوهم بكثير من الودّ والمحبّة والكرم ، وبعد ما رحلوا للمخيّم ، أوّل إحتكاك مع أهل البلد صار من خلال الفلاّحات والبدويّات اللي كانوا ييجوا عالمخيّم يبيعوا الحليب ، والقيمر ، والقريشة ، والشنكليش ، والعلت ، والخبّيزة ، واللّوف ، والعكّوب ، واللّي ضربوا صحبة مليحة مع الأهالي ، وكان على راس هذول البيّاعات وحدة بيقولولها أم ميزر ، ترى بعدني متذّكر كيف كانت تيجي لعندنا وتشرب شاي مع ستّي بعد ما تنفّق بضاعتها
كمان لأنّو المخيّم كان بعدو جديد ، والعالم معهاش مصاري تفتح مصالح ، فكانوا الكل يضطرّوا إنهم يشتروا ويتعاملوا مع تجّار البلد الحماصنة ، والتاجر اللي يراعيهم بالأسعار ، وتطلع عليه سمعة مليحة إنّو آدمي وبيخاف الله ، كنت تلاقي الكل يروح لعندو ، وحتّى في منهم تجّار كانت تبيع بالدّين مع إنها لا بتعرف المخيّم ولا عمرها حطّت إجرها فيه ، وواحد من هذول كان محل يبيع قماش وأواعي بالبلد إسمو ( جقليص ) ومحل ثاني كان يبيع كباكيب صوف للنسوان اللي بدها تعمل كنزات إسمو ( حلاّبو ) ويمكن لحد إسّه في عالم بعدها بتشتري من هذي المحلاّت ، مع إنّو صار في محلاّت من مختلف الأشكال والألوان بالمخيّم .......

[إياد حياتله]

مخيّم العائدين 5

طيّب يا جماعة الخير بدّي أحكيلكوا هالحكاية اللي صارت بيني وبين حياة جدّي لمّا كان عمري أربع أو خمس سنين ، والله وكيلكو بتذكّرها وكأنها صارت مبارح
هاظا جدّي أبو أبوي كان أعمى ، يعني بيشوفش ، وكان يعيش معنا بنفس الدار ، إلو مضافتو وباب بيفتح على الشارع على طول ، وكان موسوس لدرجة الهوس من ناحية النظافة ، ومثل ما بيقولوا الله أخذ منّو بصرو وأعطاه إشي ثاني بدالو ، أعطاه حاسّة سمع قوية كثير كثير ، كان يعرفنا من صوت نفسنا وحركة مشيتنا حتّى قبل ما نحكي
وأكثر إشي كان يزعجو ويطلّعو عن طورو ، ويخلّي الجنان براسو يوصل لفوق فوق ، هو لمّا واحد منّا يفوت على غرفتو حافي ويدعس على الحصيرة ، وهيك بنتقل الأوساخ من الأرض للحصيرة عن طريق إجرينا
ومرّة من المرّات ، فُتت أنا وأخوي وإبن عمّي اللي كانوا هم الأثنين أكبر منّي ، فتنا حافيين على المضافة ، قام جدّي حسّ علينا ولحقنا يزمجر ورانا ، وصار يتحاوانا من أوضة لأوضة وإحنا من الخوف طايرين قدّامو مثل السعادين ، طلعنا على أرض الدار ، طلع ورانا ، فتنا عالمطبخ ، فات ورانا وسكّر الباب ، كان في شبّاك بين المطبخ والأوضة اللي جنبو ، أخوي وإبن عمّي قدروا ينطّوا منّو وينفذوا بجلودهم ، أما أنا العبد الفقير ، بس كنت عم بحاول أتعربش لأوصل لطرف الشبّاك ، حسّيت بإيدين جدّي الكبار عم تقضبني من قفاي
شو بدكو بالطويلة ، يعني صارت الكمالة معروفة ، هات يا ضرب ، بالإيدين وبالشلاليط ، ووين الجنب اللي بيوجعك ، وأمّي ومرت عمّي والكل يترجّاه من وراه الباب ، بدون فايدة ، وما تركني إلأا بعد ما نهنهني عالآخر ، يعني أكلت قتلة نصّها الأوّلاني موت ، ونصها الثاني موت كمان
هاظا مع العلم أنّو جدّي أبو هويّن كان يحبّني كثير ، ويموت فيني موت ، ولإسّة في عندي صور عمرها أكثر من أربعين سنه وهو يلّعبني وشايلني على ظهرو ، رح أحط لكو إياها لحتّى تمتّعوا أنظاركو بطلعتّي البهيّة وأنا ولد بالمخيّم
وإن شا لله بالمستقبل رايح أحكيلكوا أكثر عن جدّي ( الله يرحمو ويرحم أمواتكو جميع ... )

هاذي الصورة عمرها 45 سنة
وأنا راكب على ظهر جدّي الضرير
وأخوي وأولاد عمّي عم يمشوا فيه

[إياد حياتله]

كل عام وأنتم والإسلام بألف بخير

[سلمى رشيد]

أخي الكريم اياد
وكل عام وأنت والعائلة الكريمة بألف خير وأسعدتنا بهذه الذكريات الرمضانية ولو فيها ضرب من جدك ،، رحمه الله رحمة واسعة وغفر لأجدادنا جميعا.
اللهم آمين.

[إياد حياتله]

المشاركة الأصلية كتبت بواسطة سلمى رشيد

أخي الكريم اياد
وكل عام وأنت والعائلة الكريمة بألف خير وأسعدتنا بهذه الذكريات الرمضانية ولو فيها ضرب من جدك ،، رحمه الله رحمة واسعة وغفر لأجدادنا جميعا.
اللهم آمين.

وأنت بخير أيتها الأخت الفاضلة سلمى
وأنتم بخير جميعا
وسامحوني على التأخير والإنقطاع